ملکی ترقی و خوشحالی میں اقلیتوں کا کردار انتہائی اہم ہے: فیصل کریم کنڈی

گورنر خیبر پختونخوا فیصل کریم کنڈی نے کہا ہے کہ اقلیتی برادری پاکستان میں برابر کی شہری ہے اور ملک کی ترقی و خوشحالی میں ان کا کردار انتہائی اہمیت کا حامل ہے۔ وہ پارلیمنٹ ہاؤس میں قومی اقلیتی دن کے حوالے سے منعقدہ ایک وقار تقریب سے خطاب کر رہے تھے۔

اپنے خطاب میں گورنر کے پی کے نے کہا کہ یہ دن بابائے قوم قائد اعظم محمد علی جناح کے ویژن اور آئینِ پاکستان میں درج مساوات، آزادی، انسانی وقار اور شمولیت کے اصولوں سے تجدیدِ عہد کا موقع فراہم کرتا ہے۔ انہوں نے یاد دلایا کہ محترمہ بے نظیر بھٹو شہید نے اقلیتوں کے حقوق کے لیے ہمیشہ آواز بلند کی، جبکہ صدرِ مملکت آصف علی زرداری اور چیئرمین پیپلز پارٹی بلاول بھٹو زرداری بھی اقلیتی برادری کے حقوق کے تحفظ کے لیے مکمل پرعزم ہیں۔

تقریب میں چیئرمین سینیٹ سید یوسف رضا گیلانی، سابق وزیراعظم راجہ پرویز اشرف، وزیر مملکت برائے مذہبی امور کھیل داس کوہستانی، سینیٹر دنیش کمار، سینیٹر مولانا عطاء الرحمٰن سمیت متعدد سینیٹرز، اراکینِ قومی اسمبلی اور ‘پارلیمنٹیرینز مینارٹیز کاکس’ کے اراکین نے بڑی تعداد میں شرکت کی۔