امریکا ایران مذاکرات جمعے کو عمان میں ہوں گے، مارکو روبیو کی تصدیق

امریکی وزیر خارجہ مارکو روبیو نے تصدیق کی ہے کہ امریکا اور ایران کے درمیان اہم مذاکرات جمعے کے روز عمان میں منعقد ہوں گے۔

اپنے بیان میں مارکو روبیو کا کہنا تھا کہ ایران نے پہلے مذاکرات کے مقام کے طور پر استنبول کا ذکر کیا تھا، تاہم بعد ازاں مقام تبدیل کر دیا گیا۔ انہوں نے کہا کہ امریکی مشیر سٹیو وٹکوف مذاکرات کے لیے تیار ہیں اور امریکا چاہتا ہے کہ ایران بیلسٹک میزائل پروگرام پر بھی بات چیت کرے۔

دوسری جانب ایک ایرانی عہدیدار نے واضح کیا ہے کہ امریکا سے مذاکرات صرف جوہری معاہدے تک محدود ہوں گے اور میزائل پروگرام کسی صورت ایجنڈے کا حصہ نہیں ہوگا۔ ایرانی حکام کے مطابق جوہری مذاکرات جمعے کی صبح 10 بجے عمان کے دارالحکومت مسقط میں شروع ہوں گے۔

ذرائع کے مطابق دونوں ممالک کے مؤقف میں واضح فرق موجود ہے، تاہم عالمی برادری ان مذاکرات کو خطے میں کشیدگی کم کرنے کی جانب ایک اہم پیش رفت قرار دے رہی ہے۔