امریکا نے ایران پر مزید پابندیاں عائد کردیں

امریکہ نے ایران پر معاشی دباؤ مزید بڑھاتے ہوئے اس کے خلاف نئی اور وسیع تر اقتصادی پابندیوں کا اعلان کر دیا ہے، جس کے تحت غیر ملکی زرِ مبادلہ تک تہران کی رسائی کو مزید محدود کر دیا گیا ہے۔ امریکی محکمہ خزانہ کے مطابق، ان پابندیوں کا بنیادی ہدف دبئی میں مقیم معروف ایرانی کاروباری شخصیت علی انصاری ہیں، جن پر الزام ہے کہ وہ ایران کے سپریم لیڈر آیت اللہ علی خامنہ ای کے صاحبزادے مجتبیٰ خامنہ ای اور دیگر اعلیٰ حکومتی و عسکری شخصیات کے لیے ایک عالمی مالیاتی نیٹ ورک چلا رہے تھے۔ علی انصاری نے مبینہ طور پر سرکاری دولت کو جرمنی، برطانیہ، اسپین، قبرص اور یو اے ای (UAE) میں جائیدادوں اور تجارتی اثاثوں میں منتقل کیا، جسے ایرانی اشرافیہ اور پاسدارانِ انقلاب (IRGC) کے مفادات کے لیے استعمال کیا جاتا تھا۔ ان اثاثوں کا بڑا حصہ ‘آیندہ بینک’ کے ذریعے حاصل کیا گیا تھا جو 2025 میں اربوں ڈالر کے قرضوں کے باعث ڈوب گیا تھا۔

پابندیوں کی زد میں تین ایرانی کرنسی ایکسچینج ہاؤسز (محمد دربانی، لواسانی، اور محسن خندان اینڈ پارٹنرز) اور ان سے وابستہ ہانگ کانگ اور امارات میں قائم متعدد فرنٹ کمپنیاں بھی آئی ہیں، جنہوں نے پابندیوں کا شکار ایرانی بینکوں کے لیے کروڑوں ڈالر کا انتظام کیا۔ امریکی محکمہ خارجہ کے ترجمان ٹومی پگوٹ کا کہنا ہے کہ ان اقدامات کا مقصد ایرانی اشرافیہ کی مالی شہ رگ کاٹنا ہے۔ واضح رہے کہ یہ پابندیاں ایک ایسے وقت میں لگائی گئی ہیں جب حال ہی میں ٹرمپ انتظامیہ نے جنگ بندی کے تناظر میں جاری وہ عارضی لائسنس بھی منسوخ کر دیا ہے جس کے تحت ایران کو محدود پیمانے پر خام تیل اور پیٹروکیمیکل مصنوعات بیچنے کی اجازت تھی۔