بھارتی یوم آزادی: مقبوضہ کشمیر میں پابندیاں مزید سخت، فورسز کی بھاری نفری تعینات

مقبوضہ جموں و کشمیر میں بھارتی یومِ آزادی کے موقع پر قابض انتظامیہ کی جانب سے سیکیورٹی کے نام پر پابندیاں مزید سخت کر دی گئی ہیں، جس سے وادی میں خوف و ہراس کی فضا قائم ہے۔ کشمیر میڈیا سیل کے مطابق سری نگر سمیت تمام اہم قصبوں اور حساس مقامات پر بھارتی فوج، پیراملٹری اور پولیس کی اضافی نفری تعینات کر کے پورے علاقے کو ایک فوجی چھاؤنی میں تبدیل کر دیا گیا ہے۔ تمام مرکزی اور رابطہ شاہراہوں پر نئے ناکے اور اضافی چیک پوسٹیں قائم کی گئی ہیں، جہاں گاڑیوں، مسافروں اور عام راہگیروں کی تلاشی کا نام نہاد عمل جاری ہے۔ بھارتی فورسز نے سری نگر کے بخشی اسٹیڈیم کو مکمل طور پر اپنے حصار میں لے لیا ہے، جہاں بھارتی یومِ آزادی کی مرکزی تقریب منعقد کی جا رہی ہے۔ اسٹیڈیم اور اس کے اطراف کی عمارتوں پر ماہر نشانہ باز (سنائپرز) تعینات کر دیے گئے ہیں جبکہ ڈرون کیمروں کے ذریعے فضائی نگرانی بھی کی جا رہی ہے۔ عوامی نقل و حرکت پر عائد ان سخت پابندیوں کے باعث وادی کے عام شہریوں کو شدید مشکلات کا سامنا ہے