نیویارک: کوئینز بورو ہال میں پاکستان کا یومِ آزادی شاندار انداز میں منایا گیا، کمیونٹی رہنماؤں کو ایوارڈز بھی دیئے گئے

نیویارک کے علاقے کوئینز بورو ہال میں پاکستان کے یومِ آزادی کی مناسبت سے ایک پروقار تقریب کا انعقاد کیا گیا، جس کی میزبانی کوئینز بورو پریزیڈنٹ ڈونوون رچرڈز جونیئر نے کی جبکہ نظامت کے فرائض All About Inc. کی فاؤنڈنگ ڈائریکٹر آعیزہ عرفان نے انجام دئیے۔ تقریب میں پاکستانی قونصل جنرل، کمیونٹی رہنماؤں اور مختلف شعبہ ہائے زندگی سے تعلق رکھنے والی نمایاں شخصیات نے بڑی تعداد میں شرکت کی۔ اس موقع پر بورو پریزیڈنٹ ڈونوون رچرڈز اور قونصل جنرل نے کوئینز کی ترقی اور پاک امریکہ تعلقات کو مضبوط بنانے میں پاکستانی امریکن کمیونٹی کے اہم کردار کو سراہا۔ تقریب کے دوران مختلف شعبوں میں نمایاں خدمات انجام دینے والے افراد کو ایوارڈز اور تعریفی اسناد پیش کی گئیں، جن میں پاکولی تنظیم کے عتیق قادری بھی شامل تھے جن کی ٹیم نے دونوں ممالک کے قومی ترانے پیش کیے۔ پروگرام میں مقامی کمیونٹی ممبران بدر بھٹی اور ناہید بھٹی کا اہم تعاون رہا، جبکہ گلوکارہ فرزانہ حقی اور شیر جان احمد نے ملی نغمے پیش کر کے تقریب میں رنگ بھر دیا۔ یہ شاندار تقریب نیویارک میں پاکستانی ورثے اور کمیونٹی کی کامیابیوں کی ایک خوبصورت عکاس ثابت ہوئی۔