امریکا کی اپنے سفارتی عملے کو پہلی دستیاب پرواز سے فوری اسرائیل چھوڑنے کی ہدایت

اسرائیل میں تعینات امریکی سفیر مائیک ہیکبی نے سفارت خانے کے غیر ضروری عملے اور ان کے اہل خانہ کو فوری طور پر ملک چھوڑنے کی ہدایت جاری کر دی ہے۔ سفارتی عملے کو بھیجی گئی ایک ای میل میں کہا گیا ہے کہ جو لوگ رضاکارانہ طور پر نکلنا چاہتے ہیں وہ آج ہی بن گوریون ایئرپورٹ سے کسی بھی دستیاب پرواز کے ذریعے روانگی کا بندوبست کریں۔ امریکی محکمہ خارجہ نے بھی سکیورٹی خدشات کے پیشِ نظر اس اقدام کی توثیق کر دی ہے۔ تجزیہ کار اسے خطے میں کسی بڑی فوجی کارروائی یا جوابی حملے کے پیشِ نظر احتیاطی تدبیر قرار دے رہے ہیں۔