ایران کی ناکہ بندی کے آغاز سے 105 بحری جہازوں کا رخ تبدیل کروایا، سینٹ کام

امریکی ملٹری کی سینٹرل کمانڈ (CENTCOM) نے دعویٰ کیا ہے کہ ایران کے خلاف عائد بحری ناکہ بندی کے دوسرے مرحلے کے آغاز سے اب تک مجموعی طور پر 105 تجارتی بحری جہازوں کا رخ تبدیل کروایا جا چکا ہے۔ سینٹ کام کے مطابق، یہ کارروائیاں امریکی پابندیوں اور ناکہ بندی کے قوانین پر مکمل عملدرآمد یقینی بنانے کے لیے کی گئی ہیں تاکہ کسی بھی غیر مجاز جہاز کو ایرانی بندرگاہوں میں داخل ہونے یا وہاں سے نکلنے سے روکا جا سکے۔

سینٹ کام کی جانب سے جاری کردہ بیان کے مطابق بحیرہ عرب میں موجود امریکی بحری جہاز ‘یو ایس ایس باکسر’ (USS Boxer) سے مسلسل پروازوں کے آپریشنز کیے جا رہے ہیں۔ جہاز پر تعینات امریکی میرینز کی خصوصی یونٹ ناکہ بندی پر عملدرآمد کے لیے سمندری حدود میں مسلسل نگرانی اور گشت جاری رکھے ہوئے ہے۔ واضح رہے کہ امریکی سینٹرل کمانڈ نے جولائی میں ایرانی بحری راستوں کی ناکہ بندی کی بحالی کا اعلان کیا تھا، جس کے تحت ایرانی ساحلوں پر آنے اور جانے والی تمام تر تجارتی و بحری آمدورفت کو سخت سیکیورٹی محاصرے میں رکھا جا رہا ہے۔