نمازیوں کو مقدس مقام پر نشانہ بنانا انتہائی سفاکانہ اور انسانیت سوز فعل ہے: حنیف عباسی

وفاقی وزیرِ ریلوے محمد حنیف عباسی نے کوہاٹ پولیس لائنز کی مسجد میں ہونے والے بزدلانہ اور سفاکانہ دھماکے کی سخت ترین الفاظ میں مذمت کرتے ہوئے قیمتی انسانی جانوں کے ضیاع پر دلی افسوس اور گہرے رنج و غم کا اظہار کیا ہے۔ انہوں نے اپنے ایک بیان میں کہا کہ باجماعت نمازیوں کو مسجد جیسے مقدس و محترم مقام پر نشانہ بنانا انتہائی سفاکانہ اور انسانیت سوز فعل ہے۔ معصوم جانوں سے کھیلنے والے یہ درندہ صفت دہشت گرد کسی بھی قسم کی رعایت کے مستحق نہیں ہیں اور ایسے عناصر پاکستان کے امن و امان کو سبوتاژ کرنے کے اپنے مذموم عزائم میں کبھی کامیاب نہیں ہوں گے۔

وفاقی وزیرِ ریلوے نے اس عزم کا اعادہ کیا کہ دہشت گردی کے اس ناسور کے خلاف جنگ میں پوری قوم اپنی بہادر سیکیورٹی فورسز اور بالخصوص پولیس اہلکاروں کے شانہ بشانہ کھڑی ہے۔ ملک میں پائیدار امن کے قیام کے لیے فورسز کی لازوال قربانیاں تاریخ کا سنہرا باب ہیں اور ہمارے شہداء کا لہو دہشت گردی کے مکمل خاتمے کے لیے قومی عزم کو مزید جلا بخشتا ہے۔ محمد حنیف عباسی نے شہداء کے درجات کی بلندی، سوگوار خاندانوں کے لیے صبرِ جمیل اور زخمیوں کی جلد صحت یابی کی دعا کرتے ہوئے غمزدہ خاندانوں سے دلی یکجہتی کا اظہار کیا۔