سال کے اختتام تک 3 لاکھ افراد کو فوج میں بھرتی کرنے کا کوئی منصوبہ نہیں، کریملن

روس کے دارالحکومت ماسکو میں کریملن نے ان خبروں کی باضابطہ تردید کر دی ہے جن میں دعویٰ کیا گیا تھا کہ روسی حکومت رواں سال 2026ء کے اختتام تک مزید 3 لاکھ افراد کو فوج میں بھرتی کرنے کا منصوبہ بنا رہی ہے۔ روسی صدر ولادیمیر پوتن کے ترجمان دیمتری پیسکوف نے ایک پریس بریفنگ میں واضح کیا کہ روس کے پاس سال کے اختتام تک 3 لاکھ افراد کو متحرک (mobilize) کر کے مسلح افواج کا حصہ بنانے کی کوئی تجاویز یا منصوبے زیرِ غور نہیں ہیں۔

اس سے قبل بین الاقوامی خبر رساں ادارے بلومبرگ نے ایک یورپی سیکیورٹی اہلکار کا حوالہ دیتے ہوئے رپورٹ شائع کی تھی، جس میں کہا گیا تھا کہ روس رواں سال کے اختتام تک 3 لاکھ شہریوں کو فوج میں لانے کی تیاریوں میں مصروف ہے۔ جب صحافیوں نے اس حوالے سے صدارتی ترجمان دیمتری پیسکوف سے جواب طلب کیا تو انہوں نے مغربی میڈیا کے اس دعوے کو مکمل طور پر بے بنیاد قرار دیتے ہوئے مسترد کر دیا اور دہرایا کہ 3 لاکھ اضافی افراد کو فوج میں بھرتی کرنے سے متعلق پھیلائی جانے والی اطلاعات میں کوئی سچائی نہیں ہے۔