آبنائے ہرمز میں ایک اور آئل ٹینکر کو نشانہ بنایا گیا: برطانیہ میری ٹائم کی تصدیق

برطانیہ کی میری ٹائم ٹریڈ آپریشنز (UKMTO) آرگنائزیشن نے اطلاع دی ہے کہ عالمی سطح پر انتہائی اہم اور حساس بحری راستے ‘آبنائے ہرمز’ میں ایک اور آئل ٹینکر کو حملے کا نشانہ بنایا گیا ہے۔ یو کے ایم ٹی او کے مطابق، نامعلوم نوعیت کا ایک میزائل ٹکرانے کے باعث آئل ٹینکر میں اچانک آگ بھڑک اٹھی، تاہم عملے کی بروقت کارروائی سے آگ پر قابو پا لیا گیا ہے اور جہاز پر موجود تمام اہلکار مکمل طور پر محفوظ رہے۔

ابتدائی رپورٹ کے مطابق متاثرہ آئل ٹینکر سے سمندر میں تیل کے رساؤ (Oil Leakage) کی کوئی اطلاع موصول نہیں ہوئی ہے۔ اس سے قبل ایران کی پاسدارانِ انقلاب (IRGC) کی بحریہ کی جانب سے باضابطہ اعلان کیا گیا تھا کہ اس نے آبنائے ہرمز کے ذریعے ‘غیر قانونی طور پر’ گزرنے کی کوشش کرنے والے ‘ٹوگو’ کے پرچم بردار ایک آئل ٹینکر کو نشانہ بنایا ہے، جس کے بعد اس خطے میں بحری امد و رفت اور سیکیورٹی خدشات میں مزید اضافہ ہو گیا ہے۔