ایران معاہدہ کرنا چاہتا ہے کیونکہ وہ مالی و عسکری لحاظ سے نقصان اٹھا رہا ہے، ٹرمپ

امریکی صدر ڈونلڈ ٹرمپ نے دعویٰ کیا ہے کہ ایران اس وقت واشنگٹن کے ساتھ معاشی و سیاسی معاہدہ کرنے کے لیے شدید بے تاب ہے، کیونکہ جاری کشیدگی کی وجہ سے ایران مالی اور عسکری دونوں لحاظ سے بے پناہ نقصان اٹھا رہا ہے۔ اپنے ایک تازہ بیان میں صدر ٹرمپ نے واضح کیا کہ اگر مجوزہ معاہدہ امریکی مفادات کے عین مطابق اور درست نہ ہوا تو وہ اس پر غور تک نہیں کریں گے۔

امریکی صدر نے زور دے کر کہا کہ امریکی عوام اور ان کی انتظامیہ کسی بھی صورت ایران کو جوہری ہتھیار حاصل کرنے کی اجازت نہیں دیں گے۔ ان کا مزید کہنا تھا کہ ایران کے ساتھ جاری جنگ و کشیدگی جلد اپنے منطقی انجام کو پہنچنے والی ہے اور اس جنگ کے ختم ہوتے ہی عالمی مارکیٹ میں خام تیل کی قیمتوں میں نمایاں کمی واقع ہو جائے گی۔ اس موقع پر صدر ڈونلڈ ٹرمپ نے یوکرین تنازع پر بات کرتے ہوئے کہا کہ روس گزشتہ تقریباً 5 سال سے یوکرین کے اتحادیوں کو نشانہ بنانے کی پالیسی پر گامزن ہے۔