دشمن ملک سے خطرات: ایران نے 3 لاکھ 13 ہزار جانثار متحرک کر دیئے

ایران کی پاسدارانِ انقلاب اور بسیج فورس کے زیراہتمام دشمن عناصر اور بیرونی خطرات سے نمٹنے کے لیے ‘جان فدا مہم’ کا آغاز کرتے ہوئے 3 لاکھ 13 ہزار جانثار رضاکاروں کو باضابطہ طور پر متحرک کر دیا گیا ہے۔ اس سلسلے میں دارالحکومت تہران میں امام حسین چوک سے انقلاب چوک تک ایک بہت بڑا اور طاقتور جلوس نکالا گیا، جس میں جان فدا مہم کی مسلح جنگی بٹالینز، دفاعی ماہرین اور مختلف معاشرتی شعبوں سے تعلق رکھنے والے افراد نے بڑی تعداد میں شرکت کی اور اپنی یکجہتی کا مظاہرہ کیا۔

مہم کے منتظمین کے مطابق اس اقدام کا بنیادی مقصد ایران کی پائیدار سیکیورٹی کے قیام میں مدد دینا، قومی یکجہتی و طاقت کا اظہار کرنا اور ملک دشمن عناصر کی جانب سے لاحق کسی بھی ممکنہ خطرے یا جارحیت کے خلاف عوامی مزاحمت کو مضبوط بنانا ہے۔ ریلی سے جذباتی خطاب کرتے ہوئے بسیج تنظیم کے سربراہ حسین تائب نے ‘جان فدا مہم’ کو دنیا کی جنگی تاریخ کا سب سے بڑا اور جرات مندانہ عوامی دفاع قرار دیا؛ انہوں نے دعویٰ کیا کہ مستقبل قریب میں پوری دنیا امریکہ کو تاریخی شکست کا سامنا کرتے ہوئے اس خطے سے مکمل ناکامی کے ساتھ نکلتے ہوئے دیکھے گی۔