امریکا کا ایران کیخلاف فوجی کارروائیوں سمیت طاقتور آپشنز پر غور

امریکی صدر ڈونلڈ ٹرمپ نے ایران کو سخت وارننگ دیتے ہوئے کہا ہے کہ امریکا ایران کے خلاف طاقتور آپشنز پر غور کر رہا ہے، جن میں فوجی کارروائی بھی شامل ہو سکتی ہے۔ ان کا کہنا تھا کہ ایران امریکی ریڈ لائن عبور کر رہا ہے اور اس صورتحال پر امریکی فوج گہری نظر رکھے ہوئے ہے۔

صدر ٹرمپ نے کہا کہ ایران کے معاملے کو فوج دیکھ رہی ہے اور ایران میں بڑھتی بدامنی کے تناظر میں متعدد آپشنز زیرِ غور ہیں۔ انہوں نے یہ بھی کہا کہ امریکا ایران میں انٹرنیٹ بحال کرانے کی صلاحیت رکھتا ہے اور اس حوالے سے ایلون مسک سے بات کی جائے گی۔

امریکی صدر کا کہنا تھا کہ ایران کی صورتحال پر مسلسل نظر ہے اور ایسا لگتا ہے کہ ایران کے بعض شہروں پر عوام کا کنٹرول قائم ہو چکا ہے۔ انہوں نے الزام عائد کیا کہ ایرانی حکومت برسوں سے اپنے عوام کے ساتھ بدسلوکی کرتی رہی اور اب اسے اس کے نتائج کا سامنا ہے۔