افغان طالبان کی مسلسل حمایت سے پاکستان میں دہشت گرد حملے بڑھ گئے: اقوام متحدہ

اقوامِ متحدہ کی سلامتی کونسل کی 38ویں مانیٹرنگ رپورٹ میں انکشاف کیا گیا ہے کہ افغان طالبان کی جانب سے کالعدم تحریکِ طالبان پاکستان (ٹی ٹی پی) کی مسلسل حمایت نے پاکستان میں دہشت گردانہ حملوں کی تعداد اور ان کی ہلاکت خیزی میں نمایاں اضافہ کیا ہے۔ 16 دسمبر 2025 سے 9 جون 2026 کے عرصے کا احاطہ کرنے والی اس رپورٹ میں واضح کیا گیا ہے کہ افغان طالبان کی عبوری حکومت کی دوہری حکمتِ عملی کے تحت ٹی ٹی پی کو نظریاتی و لاجسٹک حمایت اور پناہ گاہیں میسر ہیں، جبکہ جنگجوؤں کی افغانستان کے اندرونی علاقوں میں منتقلی سے اس کا بنیادی ڈھانچہ ختم نہیں ہوا۔ رپورٹ کے مطابق ٹی ٹی پی نے “ایئر فورس” کے قیام سمیت اپنے تنظیمی ڈھانچے کو بلوچستان، کشمیر اور گلگت تک وسعت دی ہے۔ علاوہ ازیں، رپورٹ میں ٹی ٹی پی، القاعدہ، داعش خراسان اور بلوچ لبریشن آرمی (بی ایل اے) کے درمیان مشترکہ تربیت، سہولت کاری اور لاجسٹک نیٹ ورکس کے خطرناک حد تک بڑھتے ہوئے عملی روابط کی نشاندہی بھی کی گئی ہے۔