مگرمچھ کا تیراک خاتون پر خوفناک حملہ، بازو کاٹنا پڑا

امریکی ریاست فلوریڈا کی مارین کاؤنٹی میں واقع سلور ریور میں تیراکی کے دوران مگرمچھ کے خوفناک حملے میں ایک خاتون شدید زخمی ہو گئیں، جنہیں طبی امداد کے دوران اپنا دایاں بازو کٹوانا پڑا۔ عینی شاہدین کے مطابق خاتون نے پیڈل بورڈ کے ذریعے جان بچانے کی کوشش کی، تاہم تقریباً 9 فٹ 8 انچ لمبے مگرمچھ نے انہیں پانی کے اندر کھینچ لیا۔ قریب موجود کشتی سواروں نے بروقت مدد کر کے خاتون کو پانی سے نکالا اور اسپتال منتقل کیا، جہاں ان کی حالت اب مستحکم بتائی جاتی ہے۔ واقعے کے بعد حکام نے دریا میں کشتی رانی اور تیراکی پر عارضی پابندی عائد کر دی تھی۔ فلوریڈا فش اینڈ وائلڈ لائف کنزرویشن کمیشن کے اہلکاروں نے 9 اگست کو حملہ آور مگرمچھ کو پکڑ کر علاقے سے دور منتقل کر دیا، جس کے بعد دریا کو دوبارہ کھول دیا گیا۔ حکام نے شہریوں کو آبی مقامات پر احتیاط برتنے کی ہدایت کی ہے۔