جشن آزادی پر خصوصی تھر ڈیزرٹ ٹرین آج کراچی سے روانہ ہوگی

سندھ حکومت کی جانب سے یومِ آزادی کے موقع پر خصوصی ‘تھر ڈیزرٹ ٹرین سفاری’ آج کراچی کینٹ اسٹیشن سے پاکستان-بھارت سرحد کے قریب کھوکھراپار کے لیے روانہ ہو رہی ہے۔ صوبائی وزیرِ ثقافت، سیاحت و نوادرات سید ذوالفقار علی شاہ اس خصوصی ٹرین کا افتتاح کریں گے۔ یہ ٹرین حیدرآباد، میرپورخاص اور عمرکوٹ جیسے تاریخی و ثقافتی مقامات سے ہوتی ہوئی کھوکھراپار پہنچے گی، جہاں پرچی جی ویری کے مقام پر جشنِ آزادی کی پروقار تقریب منعقد کی جائے گی۔ اس ٹرین سفاری میں 165 سے زائد سیاح اور شرکاء موجود ہیں جن کا مختلف اسٹیشنز پر پرجوش استقبال کیا جائے گا اور وہ مختلف مقامات پر عوام میں قومی پرچم بھی تقسیم کریں گے۔ سندھ حکومت کے مطابق اس اقدام کا مقصد جشنِ آزادی کو یادگار بنانا اور شہریوں کو صوبے کے تاریخی، ثقافتی اور سرحدی ورثے سے روشناس کرانا ہے۔