اقوام متحدہ کے سربراہ کی جنوبی لبنان میں امن دستے کے اہلکار کی ہلاکت کی مذمت

نیویارک/بیروت: اقوامِ متحدہ کے سربراہ انتونیو گوتریس نے جنوبی لبنان میں تعینات یو این امن مشن (UNIFIL) کے دستے پر ہونے والے حالیہ حملے اور اس کے نتیجے میں ایک امن اہلکار کی ہلاکت کی شدید الفاظ میں مذمت کی ہے۔

سیکرٹری جنرل اقوامِ متحدہ انتونیو گوتریس کے مرکزی ترجمان کی جانب سے جاری کردہ بیان کے مطابق، جنوبی لبنان میں پیش آنے والے اس افسوسناک واقعے کی اعلیٰ سطحی تحقیقات کا آغاز کر دیا گیا ہے۔ اس حملے میں اقوامِ متحدہ کے عبوری امن مشن کا ایک کارندہ جاں بحق جبکہ دو دیگر اہلکار شدید زخمی ہوئے ہیں۔

اقوامِ متحدہ کے ترجمان اسٹیفن دوجارک نے خطے کی مخدوش صورتحال اور امن دستوں کو درپیش خطرات کے حوالے سے اہم تفصیلات شیئر کیں ترجمان نے بتایا کہ لبنان میں جاری حالیہ شدید کشیدگی اور فوجی کارروائیوں میں اضافے کے بعد سے اب تک اقوامِ متحدہ کے امن مشن کے 7 اہلکار اپنی جانوں کا نذرانہ پیش کر چکے ہیں۔ اسٹیفن دوجارک نے عالمی برادری اور متنازع فریقین پر زور دیتے ہوئے کہا کہ نیلے ہیلمٹ پہنے ان امن اہلکاروں پر گھناؤنے حملے فوری طور پر بند ہونے چاہئیں۔

ترجمان نے حملے کی قانونی حیثیت پر بات کرتے ہوئے واضح کیا کہ امن مشن کے قافلوں یا تنصیبات کو نشانہ بنانا بین الاقوامی انسانی حقوق کے قوانین کی کھلی خلاف ورزی ہے۔

انہوں نے مزید کہا کہ یہ کارروائیاں سلامتی کونسل کی تاریخی قرارداد 1701 کی بھی سنگین ترین خلاف ورزی ہیں، اور بین الاقوامی قوانین کے تحت ایسے حملوں کو “جنگی جرائم” (War Crimes) کے زمرے میں شمار کیا جا سکتا ہے جس کے ذمہ داروں کا احتساب ناگزیر ہے۔