امریکا اسلام آباد ایم او یو پر عمل کرے تو ایران بھی تیار ہے: ایرانی صدر مسعود پزشکیان

بشکیک/تہران: ایران کے صدر مسعود پزشکیان نے واضح کیا ہے کہ اگر امریکا جون میں طے پانے والی ‘اسلام آباد مفاہمتی یادداشت’ (MoU) کے تحت اپنے وعدوں کی پاسداری کرتا ہے، تو ایران بھی فوری اور مثبت جواب دینے کے لیے تیار ہے۔

غیر ملکی خبر رساں ادارے کی رپورٹ کے مطابق بشکیک میں شنگھائی تعاون تنظیم (SCO) کے سربراہی اجلاس سے خطاب کرتے ہوئے ایرانی صدر نے کہا کہ ایران اور امریکا کے درمیان طے پانے والے اس عبوری معاہدے پر امریکی صدر کے ذاتی دستخط موجود تھے، تاہم واشنگٹن کی جانب سے اس دستاویز کی پاسداری دو ہفتے سے بھی کم وقت جاری رہی۔

ایرانی صدر نے اجلاس کے موقع پر وزیراعظم پاکستان شہباز شریف سے ہونے والی اہم ملاقات کا ذکر کرتے ہوئے بتایا کہ شہباز شریف نے انہیں یقین دہانی کرائی ہے کہ پاکستان، ترکیہ اور سعودی عرب کے درمیان طے پانے والا مکہ معاہدہ محض دفاعی نوعیت کا ہے اور یہ کسی بھی ملک کے خلاف نہیں بلکہ خطے میں امن و سلامتی کے قیام کے لیے قائم کیا گیا ہے۔ مسعود پزشکیان نے پاکستان کے ثالثی کردار کو سراہتے ہوئے کہا کہ مکہ معاہدہ امتِ مسلمہ کے اتحاد کی جانب ایک بڑا قدم ہے، اور اگر تمام مسلم ممالک باہمی ڈائیلاگ اور تعاون کے ذریعے متحد ہو جائیں تو اسرائیل کو حملوں کی جرأت نہیں ہوگی۔