شنگھائی تعاون تنظیم ابھرتی ہوئی کثیر قطبی دنیا کا آزاد اور بااثر مرکز بن چکی ہے، صدر پوتن

 روس کے صدر ولادیمیر پوتن نے کہا ہے کہ شنگھائی تعاون تنظیم (SCO) گزشتہ 25 برسوں کے دوران شاندار ترقی کرتے ہوئے ابھرتی ہوئی کثیر قطبی (Multipolar) دنیا کے آزاد اور بااثر ترین مراکز میں شامل ہو چکی ہے۔

کرغزستان کے دارالحکومت بشکیک میں شنگھائی تعاون تنظیم کے سربراہی اجلاس سے خطاب کرتے ہوئے صدر ولادیمیر پوتن نے کہا کہ یہ تنظیم 2001 میں روس، چین، قازقستان، تاجکستان، کرغزستان اور ازبکستان کی مشترکہ کاوشوں سے قائم کی گئی تھی۔ اپنے قیام کے بعد سے یہ اتحاد مسلسل مضبوط اور وسیع ہوا ہے اور آج عالمی سطح پر ایک اہم اور بااثر ترین فورم کی حیثیت اختیار کر چکا ہے۔

روسی صدر کا کہنا تھا کہ شنگھائی تعاون تنظیم اب صرف یوریشیائی براعظم تک محدود نہیں رہی بلکہ عملی طور پر پوری دنیا کی سب سے بڑی علاقائی تنظیم بن چکی ہے۔ انہوں نے زور دیا کہ ایس سی او کی موجودہ بین الاقوامی حیثیت اس بات کی عکاسی کرتی ہے کہ عالمی نظام تیزی سے کثیر قطبی سمت میں آگے بڑھ رہا ہے، جہاں یہ تنظیم نئے عالمی فریم ورک میں ایک خودمختار اور مؤثر قوت کے طور پر اپنا بنیادی کردار ادا کر رہی ہے۔