یورپی یونین واشنگٹن کے غیر قانونی اقدامات میں شریک بن چکی ہے: اسماعیل بقائی

ایرانی وزارتِ خارجہ کے ترجمان اسماعیل بقائی نے یورپی یونین کو شدید تنقید کا نشانہ بناتے ہوئے کہا ہے کہ بلاک اپنی خودمختاری، قوانین اور اخلاقی اقدار امریکا کے پاس گروی رکھوا چکا ہے۔ اپنے ایک جاری کردہ بیان میں ان کا کہنا تھا کہ یورپی یونین ایران کے خلاف امریکی یکطرفہ اور غیر قانونی پابندیوں کی اندھی حمایت کر رہی ہے، جبکہ یہی یورپی یونین 1996ء میں امریکی پابندیوں کے خلاف اپنی خودمختاری کا دفاع کرتی تھی۔ انہوں نے مزید کہا کہ واشنگٹن کے معاشی دباؤ کی حمایت عالمی قوانین کی سنگین خلاف ورزی ہے اور اس طرزِ عمل نے ثابت کر دیا ہے کہ یورپی یونین اخلاقی زوال اور سیاسی نااہلی کا شکار ہو کر علاقائی استحکام پر بات کرنے کی اہلیت کھو چکی ہے۔