برطانیہ کے 2 بڑے ہوائی اڈوں کو بم سے اڑانے کی دھمکیاں، یورپ بھر میں 12 پروازوں کا رخ موڑ دیاگیا

برطانیہ کے دو اہم اور بڑے ہوائی اڈوں، ہیتھرو (Heathrow) اور برمنگھم (Birmingham) کو بم سے اڑانے کی دھمکیاں موصول ہونے کے بعد برطانیہ اور یورپ کے سیکیورٹی ادارے فوری طور پر متحرک ہو گئے ہیں۔

بم کی دھمکیوں کے باعث یورپ کے مختلف شہروں سے آنے اور جانے والی کم از کم 12 مسافر پروازوں کے روٹ میں تبدیلی کی گئی۔ سیکیورٹی ذرائع کے مطابق کوپن ہیگن، ہیلسنکی، میڈرڈ، میلان اور وارسا جانے والی پروازوں کو بھی دھمکی آمیز پیغامات موصول ہوئے۔ اس دوران نیوکاسل اور گلاسگو سے پراگ پہنچنے والی ایزی جیٹ (EasyJet) کی دو پروازوں کو پولیس اور بم ڈسپوزل اسکوائڈ نے گھیرے میں لے کر سیکیورٹی خدشات کے پیشِ نظر تفصیلی تلاشی لی۔ ایزی جیٹ کے ترجمان کے مطابق دونوں پروازوں کے مسافروں کو بحفاظت اور معمول کے مطابق اتارا گیا۔

مزید برآں، ڈبلن سے روم جانے والی ایک پرواز کا رخ سیکیورٹی خطرات کے تحت فرانس کے فوجی ہوائی اڈے کی جانب موڑ دیا گیا، جہاں مکمل چیکنگ کے دوران کوئی مشکوک یا دھماکہ خیز مواد برآمد نہیں ہوا۔ بم کی ان دھمکیوں کے باوجود ہیتھرو اور برمنگھم ایئرپورٹس پر فضائی آپریشن معمول کے مطابق جاری رہا اور برطانوی ایوی ایشن حکام نے ان دھمکیوں کو غیر معتبر اور جھوٹی افواہ قرار دیا ہے۔