کراچی آنے والی نجی ایئرلائن کی پرواز دوران لینڈنگ بڑے حادثے سے بال بال بچ گئی

اسلام آباد سے کراچی آنے والی نجی ایئر لائن کی پرواز لینڈنگ کے دوران ایک ہولناک حادثے سے بال بال بچ گئی۔

ایئرپورٹ ذرائع کے مطابق واقعہ کراچی کے جناح انٹرنیشنل ایئرپورٹ کی فضائی حدود میں اس وقت پیش آیا جب پرواز لینڈنگ کے مرحلے میں تھی کہ اچانک طیارے سے پرندہ ٹکرا گیا۔ پرندہ ٹکرانے کے باعث طیارے کے اگلے حصے (ریڈوم) اور بلک ہیڈ فریموں کو شدید نقصان پہنچا، تاہم پائلٹ نے مہار ت اور حاضردماغی کا مظاہرہ کرتے ہوئے طیارے کو بحفاظت لینڈ کرا لیا، جس کے نتیجے میں تمام مسافر محفوظ رہے۔

ذرائع کا مزید کہنا ہے کہ واقعے کے فوری بعد نجی ایئر لائن کے طیارے کو مزید پروازوں کے لیے گراؤنڈ کر دیا گیا ہے۔ سول ایوی ایشن اور ٹیکنیکل ٹیموں کی جانب سے طیارے کا تفصیلی معائنہ کیا جا رہا ہے اور مکمل کلیئرنس ملنے کے بعد ہی اسے دوبارہ آپریشنل کیا جائے گا۔