ظہران ممدانی کا ڈیموکریٹس سے انتخابی کامیابی عوامی ریلیف میں بدلنے کا مطالبہ

نیویارک کے میئر ظہران ممدانی نے ڈیموکریٹک پارٹی کی قیادت پر زور دیا ہے کہ وہ مڈ ٹرم انتخابات میں حاصل ہونے والی سیاسی کامیابی کو صرف اقتدار تک محدود رکھنے کے بجائے اسے عام عوام کو حقیقی معاشی ریلیف فراہم کرنے کے لیے استعمال کریں۔

میئر ظہران ممدانی نے اپنے ایک سخت بیانیہ میں کہا کہ امریکی عوام نے جنگوں اور نسل کشی پر ٹیکس دہندگان کا پیسہ بے دریغ خرچ کرنے والے سیاست دانوں کو مسترد کر دیا ہے، لہذا اب ڈیموکریٹک پارٹی کے لیے وقت آ گیا ہے کہ وہ عوام سے کیے گئے تمام وعدے پورے کرے۔ انہوں نے نشاندہی کی کہ ایران کی جنگ، افراطِ زر (مہنگائی) اور سابق صدر ٹرمپ کی متنازع پالیسیوں نے ان انتخابات میں ڈیموکریٹس کی کامیابی میں بنیادی کردار ادا کیا ہے، لیکن محض حکومت بنانا کافی نہیں بلکہ اس طاقت کو عوام کی فلاح کے لیے استعمال کرنا ہو گا۔

انہوں نے مزید کہا کہ اس وقت عام امریکی شہری مہنگائی، مکانات کے بڑھتے ہوئے کرایوں اور بچوں کی دیکھ بھال (Childcare) کے شدید اخراجات سے سخت پریشان اور نالاں ہیں۔ میئر نیویارک نے نائب صدر جے ڈی وینس کی جانب سے اصلاحات کے لیے مزید 2 سال انتظار کرنے کے مطالبے کو سخت تنقید کا نشانہ بناتے ہوئے کہا کہ ایسی باتیں معاشی مشکلات کے شکار عوام کے لیے کسی صورت قابلِ قبول نہیں ہیں۔