ایران کا جوہری پروگرام پر ثالثوں کی تجاویز کا جائزہ، قطر کی سفارتی کوششیں رنگ لانے لگیں: نیویارک ٹائمز

ایران نے اپنے جوہری پروگرام کے مستقبل سے متعلق ثالثوں کی جانب سے پیش کی گئی تجاویز کا باقاعدہ جائزہ لینا شروع کر دیا ہے، جسے امریکہ اور ایران کے درمیان جاری جنگ اور شدید کشیدگی کے خاتمے کے لیے تعطل کا شکار سفارتی کوششوں میں ایک انتہائی اہم پیش رفت قرار دیا جا رہا ہے۔

امریکی اخبار ‘نیویارک ٹائمز’ کی شائع کردہ رپورٹ کے مطابق سفارتی مذاکرات سے آگاہ 5 اعلیٰ عہدیداروں نے تصدیق کی ہے کہ کئی ہفتوں تک جوہری مذاکرات سے گریز کے بعد تہران کا تجاویز پر غور کے لیے آمادہ ہونا، قطر کی قیادت میں جاری تندوہند سفارتی کوششوں کی کامیابی کا واضح اشارہ ہے۔ عہدیداروں نے زیرِ غور شرائط کو انتہائی ‘ٹھوس تجاویز’ قرار دیا ہے، تاہم انہوں نے تاحال ان کی تفصیلات سامنے لانے سے گریز کیا۔ نام نہ ظاہر کرنے کی شرط پر بات کرنے والے ان 5 حکام میں ایک امریکی اور دو ایرانی عہدیدار بھی شامل ہیں۔

رپورٹ میں مزید انکشاف کیا گیا ہے کہ ریاستِ قطر نے گزشتہ ہفتے ایران کے ساتھ سفارتی رابطوں کا دائرہ وسیع کرتے ہوئے تہران میں مذاکرات کے 2 ادوار منعقد کیے، جبکہ تیسرا اہم دور دوحہ میں ہوا ہے۔ علاوہ ازیں، قطری حکام نے حالیہ دنوں میں آرمینیا میں بھی اعلیٰ سطح کے ایرانی حکام سے اہم ملاقاتیں کی ہیں تاکہ دونوں ممالک کے درمیان بریک تھرو حاصل کیا جا سکے۔