متحدہ عرب امارات سے پاکستانیوں کی بے دخلی کی خبروں کی اماراتی حلقوں کی سخت تردید

ابوظبی: متحدہ عرب امارات سے پاکستانی شہریوں کی مبینہ بے دخلی سے متعلق خبروں کی اماراتی حلقوں نے سختی سے تردید کرتے ہوئے انہیں بے بنیاد قرار دیا ہے۔

اماراتی حکومتی حلقوں سے قریبی تعلق رکھنے والے بعض سوشل میڈیا مبصرین اور تجزیہ کاروں نے ان رپورٹس کو مسترد کرتے ہوئے کہا ہے کہ متحدہ عرب امارات میں کسی بھی قسم کی کارروائی رنگ، نسل، مسلک یا مذہب کی بنیاد پر نہیں بلکہ مکمل طور پر قانون کے مطابق کی جاتی ہے۔

ان کا کہنا ہے کہ ملک میں تمام شہریوں اور غیر ملکیوں کے لیے قوانین اور سیکیورٹی ضوابط یکساں طور پر لاگو ہوتے ہیں، اور کسی بھی اقدام کا تعلق صرف قانونی یا انتظامی تقاضوں سے ہوتا ہے۔

یہ ردعمل ایسے وقت میں سامنے آیا ہے جب ایک بین الاقوامی خبر رساں ادارے کی رپورٹ کے بعد سوشل میڈیا پر مختلف آراء اور بحث جاری ہے، تاہم اس حوالے سے متحدہ عرب امارات کی حکومت کی جانب سے کوئی باضابطہ بیان جاری نہیں کیا گیا۔