مشہور بھارتی ٹی وی ایکٹر 16 سالہ لڑکی کو ہراساں کرنے کے الزام میں گرفتار

ڈرامہ سیریل ’سیراب‘ اور ’پانڈیا اسٹور‘ سے شہرت پانے والے معروف بھارتی ٹی وی اداکار روہت چندیل کو ممبئی پولیس نے ایک 16 سالہ لڑکی کو مبینہ طور پر ہراساں کرنے اور اس کا پیچھا کرنے کے الزام میں گرفتار کر لیا ہے۔ بھارتی میڈیا کے مطابق، اداکار کے خلاف بچوں کو جنسی جرائم سے تحفظ فراہم کرنے والے ایکٹ (پوکسو) اور بھارتیہ نیائے سنہیتا کی متعلقہ دفعات کے تحت مقدمہ درج کیا گیا ہے۔ ایف آئی آر کے مطابق، اداکار اور متاثرہ لڑکی پہلے سے ایک دوسرے کو جانتے تھے؛ تاہم روہت چندیل نے لڑکی کو بار بار فون کر کے تنگ کرنا شروع کیا اور جواب نہ ملنے پر دوسرے نمبروں کا استعمال کیا۔ 5 جولائی کو ہونے والے ایک جھگڑے کے دوران ملزم نے لڑکی پر سرِعام چلایا، اس کا پیچھا کیا اور اسے تشدد کا نشانہ بنایا، جس کے بعد متاثرہ لڑکی نے پولیس سے رجوع کیا۔ ممبئی پولیس کا کہنا ہے کہ واقعے کی جگہ سے سی سی ٹی وی (CCTV) فوٹیج اکٹھی کی جا رہی ہے اور لڑکی کے تفصیلی بیان کی روشنی میں مزید قانونی کارروائی آگے بڑھائی جائے گی۔