ایران کی طرف سے سرحد پر فائرنگ، ترک فوجی جاں بحق

ترک ایران سرحد پر سرحد پار سے ہونے والی فائرنگ کے ایک واقعے میں ایک ترکیہ کا فوجی جاں بحق ہو گیا ہے، جس کے بعد دونوں ممالک کے حکام نے معاملے کی مشترکہ تحقیقات شروع کر دی ہیں۔

برطانوی خبر رساں ایجنسی (روئٹرز) کی رپورٹ کے مطابق ترکیہ کی وزارتِ دفاع نے تصدیق کی ہے کہ یہ المناک واقعہ 31 اکتوبر کو ترک ایران سرحد کے قریب اس وقت پیش آیا جب سیکیورٹی اہلکار غیر قانونی طور پر سرحد پار کرنے کی ایک کوشش کو روک رہے تھے، اسی دوران ایران کی جانب سے کی جانے والی فائرنگ کی زد میں آ کر ترکیہ کا ایک جوان جاں بحق ہو گیا۔

ترک وزارتِ دفاع کا کہنا ہے کہ واقعے کی تمام تر حقیقت اور پہلوؤں کو سامنے لانے کے لیے ایرانی حکام کے ساتھ مل کر تحقیقات جاری ہیں۔ بیان میں مزید بتایا گیا کہ دونوں ممالک کے اعلیٰ سرحدی اور سیکیورٹی حکام نے 3 نومبر کو واقعے کے مقام کا مشترکہ دورہ کیا اور صورتحال کا جائزہ لیا، تاکہ آئندہ ایسے ناخوشگوار واقعات کی روک تھام اور شفاف تحقیقات کو یقینی بنایا جا سکے۔