تربت سے دو روز قبل اغوا ہوئے 4 پنجابی اور 2 پشتون مزدوروں کی لاشیں برآمد

بلوچستان کے ضلع تربت کے علاقے کلاتک سے دو روز قبل اغوا کیے گئے 6 مزدوروں کی گولیوں سے چھلنی لاشیں برآمد ہو گئی ہیں، جنہیں دہشت گردوں نے بے رحمی سے شہید کر دیا۔ صوبائی معاون برائے محکمہ داخلہ بابر یوسفزئی کے مطابق شہید مزدوروں میں سے 4 کا تعلق پنجاب اور 2 کا خیبر پختونخوا سے ہے، جن کی شناخت محمد ارشد، محمد تیمور، محمد پرویز، محمد وزیر، محمد امجد اور محمد یحییٰ کے نام سے ہوئی ہے۔ دہشت گردوں نے مجموعی طور پر 7 مزدوروں کو اغوا کیا تھا جن میں سے 1 کو موقع پر ہی شہید کر دیا گیا تھا۔ دوسری جانب گوادر پولیس نے کامیاب کارروائی کرتے ہوئے روزگار کے جھانسے میں یرغمال بنائے گئے 12 افراد کو بازیاب کرا کے 3 ملزمان کو گرفتار کر لیا ہے۔ حکام کے مطابق نہتے مزدوروں پر یہ بزدلانہ حملہ بلوچستان کی ترقی پر حملہ اور دہشت گردوں کی پسپائی کا ثبوت ہے۔