امریکی حملے کی صورت میں میدان جنگ کا جغرافیہ ایران طے کرے گا: قالیباف

ایرانی پارلیمنٹ کے اسپیکر محمد باقر قالیباف نے کہا ہے کہ ’میزائل سٹی‘ کی رونمائی محض ایک تکنیکی اور دفاعی کامیابی نہیں بلکہ پورے خطے میں تزویراتی توازن کی تبدیلی کی واضح علامت ہے۔ ایرانی میڈیا کے مطابق باقر قالیباف نے دوٹوک مؤقف اختیار کرتے ہوئے کہا کہ ایران اب ’نہ جنگ، نہ امن‘ کی کیفیت میں نہیں رہے گا اور امریکا مذاکرات کرنا چاہتا ہے یا جنگ، ایران کو اس سے کوئی فرق نہیں پڑتا، تاہم اگر واشنگٹن ایران کی 7 شرائط تسلیم کر لے تو معاہدے کا دروازہ کھل سکتا ہے۔ انہوں نے خبردار کیا کہ اگر امریکا نے اب کوئی غلطی کی تو میدانِ جنگ کا جغرافیہ ایرانی فوج کی طاقت طے کرے گی؛ ساتھ ہی انہوں نے امریکی وزیرِ خزانہ کے بیانات اور غیر اخلاقی زبان کو ایرانی طاقت کے سامنے امریکی بے بسی کا اظہار قرار دیتے ہوئے کہا کہ خطرات سے بچنے کے لیے فوجی پناہ گاہوں کا سہارا لینے والوں کو عظیم قوموں کی توہین کرنے کے بجائے خلیجِ فارس میں اپنی ناکامیوں پر غور کرنا چاہیے۔