پاکستان کا جی 20 میں شمولیت کا خواب اگلی دو دہائیوں میں پورا ہو سکتا ہے: قیصر احمد شیخ

وفاقی وزیرِ سرمایہ کاری قیصر احمد شیخ نے کہا ہے کہ پاکستان آئندہ دو دہائیوں میں دنیا کی بڑی معیشتوں کے گروپ ’جی 20‘ کا رکن بننے کی بھرپور صلاحیت رکھتا ہے کیونکہ ملک میں کاروبار اور سرمایہ کاری کے وسیع مواقع موجود ہیں اور کامیابی کے لیے بیرونِ ملک جانا ضروری نہیں۔ چنیوٹ میں ایک نجی یونیورسٹی کے کانووکیشن سے خطاب کرتے ہوئے قیصر احمد شیخ نے کہا کہ 25 کروڑ آبادی اور بے پناہ قدرتی وسائل کے حامل پاکستان کا سب سے بڑا سرمایہ اس کے نوجوان ہیں جنہیں اپنی صلاحیتیں ملک کی تعمیر و ترقی کے لیے بروئے کار لانی چاہئیں، جبکہ خواتین کو اعلیٰ تعلیم کے مواقع فراہم کرنا اور نوجوانوں کو جدید مہارتوں سے آراستہ کرنا ملکی ترقی کے لیے ناگزیر ہے۔ انہوں نے ماضی کا حوالہ دیتے ہوئے کہا کہ جنوبی کوریا نے پاکستان کی منصوبہ بندی سے استفادہ کیا اور پاکستان خود بھی 6 سے 7 فیصد تک معاشی ترقی کی شرح ریکارڈ کر چکا ہے، اس لیے ضرورت اس امر کی ہے کہ نوجوان ملک میں موجود معاشی ترقی و سرمایہ کاری کے بے شمار امکانات سے فائدہ اٹھاتے ہوئے قومی ترقی میں اپنا کردار ادا کریں۔