ایرانی عوام کو بھوکا رکھنے کی امریکی دھمکی جنگی جرائم کا اعتراف ہے، اسماعیل بقائی

ترجمان ایرانی وزارتِ خارجہ اسماعیل بقائی نے کہا ہے کہ امریکی وزیرِ خارجہ کی جانب سے ایرانی عوام کو ناکہ بندی کے ذریعے بھوکا رکھنے کی دھمکی دینا کھلے عام جنگی جرائم کا اعتراف ہے، جبکہ واشنگٹن ماضی کی ناکامیوں سے سبق سیکھنے کو تیار نہیں اور اپنی جنگی و سیاسی ناکامی چھپانے کے لیے فتح کا جھوٹا بیانیہ اپنا رہا ہے۔ سماجی رابطے کی ویب سائٹ ’ایکس‘ پر جاری اپنے بیان میں اسماعیل بقائی نے مؤقف اختیار کیا کہ ایران کے خلاف جنگ ہی امریکی انتخابی شکست کی بڑی وجہ بنی، اور امریکا 1953ء میں سی آئی اے کی حمایت سے ایرانی حکومت کا تختہ الٹنے، جوہری معاہدے سے یکطرفہ دستبرداری، وسیع معاشی پابندیوں، جنرل قاسم سلیمانی کے قتل اور نو ماہ سے بھی کم عرصے میں سفارتی مذاکرات کے دوران ایران پر دو مرتبہ حملے کرنے سمیت تاریخی دشمنی و فوجی جارحیت کا ذمہ دار ہے، جن میں ایران کے سپریم لیڈر، اعلیٰ حکام، خواتین اور بچوں سمیت اہم بنیادی ڈھانچے کو نشانہ بنایا گیا۔