خیبر پختونخوا میں ایمرجنسی کے دوران گورنر کے اختیارات بڑھانے کا فیصلہ

حکومتی ذرائع کے مطابق وفاقی حکومت نے خیبرپختونخوا میں امن و امان کی صورتحال کے پیشِ نظر گورنر فیصل کریم کنڈی کے اختیارات میں اضافے کا فیصلہ کیا ہے اور اس مقصد کے لیے ایک نیا آرڈیننس جاری کرنے کی تیاری کی جا رہی ہے۔ ذرائع کا کہنا ہے کہ وزیراعظم شہباز شریف نے ایمرجنسی کی صورتحال میں گورنر کو حاصل اختیارات سے متعلق مجوزہ آرڈیننس منظوری کے لیے صدرِ مملکت آصف علی زرداری کو بھجوا دیا ہے، جس کا اجرا وزیراعظم کی ایڈوائس پر جلد متوقع ہے۔ مجوزہ قانونی اقدام کے تحت ایمرجنسی کے نفاذ کے دوران گورنر کو پہلے سے زیادہ اختیارات تفویض کیے جائیں گے جبکہ خیبرپختونخوا کے 12 خصوصی اضلاع کے حوالے سے بھی گورنر فیصل کریم کنڈی کے انتظامی اختیارات میں اضافہ کیا جائے گا؛ حکومتی ذرائع کے مطابق اسی مجوزہ آرڈیننس کے اجرا کے پیشِ نظر قومی اسمبلی کا اجلاس دوبارہ شیڈول کیا گیا ہے کیونکہ پارلیمانی اجلاس طلب کیے جانے کے بعد آئینی طور پر آرڈیننس جاری نہیں کیا جا سکتا۔