ٹرمپ گرین لینڈ پر قبضہ کرنے کی دھمکیاں دینا بند کر دیں: ڈینش وزیراعظم

کوپن ہیگن: ڈنمارک کی وزیراعظم میٹ فریڈرکسن نے سابق امریکی صدر ڈونلڈ ٹرمپ سے مطالبہ کیا ہے کہ وہ گرین لینڈ پر قبضے سے متعلق بیانات اور دھمکیاں دینا بند کریں۔

ڈینش وزیراعظم نے کہا کہ امریکا کی جانب سے گرین لینڈ پر قبضے کی ضرورت پر بات کرنا بالکل بے معنی ہے۔ ان کا کہنا تھا کہ امریکا کو ڈنمارک کی بادشاہت میں شامل تین ممالک میں سے کسی کو بھی ضم کرنے کا کوئی حق حاصل نہیں۔

میٹ فریڈرکسن کے یہ ریمارکس اس وقت سامنے آئے جب ڈونلڈ ٹرمپ کے مشیر اسٹیفن ملر کی اہلیہ کیٹی ملر نے سوشل میڈیا پر گرین لینڈ کا نقشہ امریکی پرچم کے رنگوں میں شائع کرتے ہوئے اس کے ساتھ ’’جلد‘‘ کا لفظ تحریر کیا۔ اس سے قبل بھی ڈونلڈ ٹرمپ متعدد بار گرین لینڈ کی اسٹریٹجک اہمیت اور معدنی وسائل کا حوالہ دیتے ہوئے اسے امریکا کا حصہ بنانے کے امکان کا ذکر کر چکے ہیں۔

ڈنمارک کی وزیراعظم نے کہا کہ وہ براہِ راست امریکا سے مخاطب ہیں اور اس بات کی یاد دہانی کرائی کہ گرین لینڈ سمیت ڈنمارک نیٹو کا رکن ہے۔ انہوں نے کہا کہ ڈنمارک اور امریکا کے درمیان دفاعی معاہدہ موجود ہے جو امریکا کو گرین لینڈ تک رسائی فراہم کرتا ہے، جبکہ ڈنمارک نے آرکٹک خطے میں سکیورٹی پر سرمایہ کاری بھی بڑھا دی ہے۔

میٹ فریڈرکسن نے مزید کہا کہ وہ امریکا سے سختی سے اپیل کریں گی کہ ایک قریبی اتحادی، دوسرے ملک اور اس کے عوام کے خلاف دھمکی آمیز رویہ اختیار نہ کیا جائے۔ ان کا کہنا تھا کہ ڈنمارک واضح طور پر یہ مؤقف اختیار کر چکا ہے کہ وہ فروخت کے لیے نہیں ہے۔

اس سے قبل ایئر فورس ون میں گفتگو کرتے ہوئے ڈونلڈ ٹرمپ نے کہا تھا کہ امریکا کو قومی سلامتی کے نقطۂ نظر سے گرین لینڈ کی ضرورت ہے اور ڈنمارک یہ ذمہ داری پوری نہیں کر سکتا۔

یہ معاملہ ایک ایسے وقت میں عالمی سطح پر زیرِ بحث آیا ہے جب امریکا کی جانب سے وینزویلا کے خلاف ایک بڑی فوجی کارروائی کے بعد صدر نکولس مادورو اور ان کی اہلیہ کو گرفتار کر کے نیویارک منتقل کیے جانے کی خبریں سامنے آئی ہیں۔