ٹرمپ نے ایک بار پھر پاک بھارت جنگ رکوانے، 8 طیارے گرنے کا ذکر کر دیا

واشنگٹن: امریکی صدر ڈونلڈ ٹرمپ نے ایک بار پھر پاکستان اور بھارت کے درمیان ممکنہ جنگ رکوانے کا دعویٰ کرتے ہوئے کہا ہے کہ ان کی مداخلت سے دونوں ممالک کے درمیان تصادم ٹل گیا تھا، جس دوران 8 طیارے بھی گرائے گئے تھے۔

وائٹ ہاؤس میں صحافیوں سے گفتگو کرتے ہوئے صدر ٹرمپ نے کہا کہ انہوں نے پاکستان اور بھارت سمیت دنیا بھر میں 8 جنگیں رکوائیں۔ ان کا کہنا تھا کہ پاکستانی وزیراعظم بھی اس بات کا اعتراف کر چکے ہیں کہ جنگ رکوا کر لاکھوں جانیں بچائی گئیں۔

صدر ٹرمپ نے وینزویلا کے حوالے سے گفتگو کرتے ہوئے کہا کہ اگر امریکا وینزویلا کے تیل پر کنٹرول حاصل نہ کرتا تو روس اور چین وہاں پہنچ جاتے۔ ان کے مطابق امریکا اور وینزویلا کے پاس دنیا کے 55 فیصد تیل کے ذخائر موجود ہیں اور روس و چین اتنا تیل خرید سکتے ہیں جتنا وہ امریکا یا وینزویلا سے لینا چاہیں۔

ٹرمپ نے کہا کہ روسی صدر ولادیمیر پیوٹن یورپ سے نہیں بلکہ امریکا سے خوفزدہ ہیں۔ انہوں نے کہا کہ وہ چین اور روس کے عوام سے محبت کرتے ہیں، پیوٹن ایک اچھے انسان ہیں لیکن انہوں نے انہیں مایوس کیا ہے۔