جنگ کے خاتمے کی امریکی تجویز پر ایران کا جواب آج متوقع ہے: ٹرمپ

امریکی صدر ڈونلڈ ٹرمپ نے انکشاف کیا ہے کہ مشرقِ وسطیٰ میں جاری تنازع کے خاتمے کے لیے امریکہ کی جانب سے ایران کو بھیجی گئی تجویز پر تہران کا جواب آج متوقع ہے۔ میڈیا سے گفتگو کرتے ہوئے صدر ٹرمپ نے کہا کہ ایران کی عسکری قوت شدید متاثر ہو چکی ہے، اب دیکھنا یہ ہے کہ وہ کیا فیصلہ کرتے ہیں۔ انہوں نے خبردار کیا کہ اگر معاملات آگے نہ بڑھے تو امریکہ “پراجیکٹ فریڈم پلس” کی طرف جا سکتا ہے جس میں مزید سخت اقدامات شامل ہوں گے۔

دوسری جانب ایرانی وزارتِ خارجہ کے ترجمان اسماعیل بقائی نے تصدیق کی ہے کہ تہران امریکی تجاویز کا جائزہ لے رہا ہے اور کسی حتمی نتیجے پر پہنچنے کے بعد ہی اس کا اعلان کیا جائے گا۔ تاہم انہوں نے واضح کیا کہ ایران کسی بھی امریکی ڈیڈ لائن کو خاطر میں نہیں لاتا۔ انہوں نے جمعرات کی رات ہونے والی کارروائی کو بین الاقوامی قوانین کی خلاف ورزی قرار دیتے ہوئے کہا کہ ایرانی افواج کسی بھی صورتحال سے نمٹنے کے لیے مکمل تیار ہیں۔