ٹرمپ کا دعویٰ: بھارت اور پاکستان کے تنازع کو ٹیرف کے ذریعے روکا، ایران سے مذاکرات ناکام ہوئے تو سخت اقدام

امریکی صدر ڈونلڈ ٹرمپ نے ایک بار پھر دعویٰ کیا ہے کہ انہوں نے مئی 2025 میں بھارت اور پاکستان کے درمیان تنازع کو روکنے میں کلیدی کردار ادا کیا۔ انہوں نے کہا کہ محصولات (ٹیرف) کو بطور ہتھیار استعمال کرتے ہوئے اس کشیدگی کو کم کیا گیا۔

امریکی نیوز چینل کو دیے گئے انٹرویو میں صدر ٹرمپ نے کہا، “میں نے 8 جنگیں ختم کرائیں، جن میں سے کم از کم 6 ٹیرف کی وجہ سے رکیں۔ میں نے کہا اگر تم جنگ بند نہیں کرو گے تو میں تم پر ٹیرف عائد کر دوں گا، کیونکہ میں لوگوں کو مرتے نہیں دیکھنا چاہتا۔”

انہوں نے مزید کہا کہ بھارت اور پاکستان کے درمیان صورتحال انتہائی کشیدہ تھی اور یہ جوہری جنگ میں تبدیل ہو سکتی تھی، آٹھ طیارے تباہ ہو چکے تھے اور حالات بہت سنگین تھے۔ صدر نے کہا کہ وزیرِاعظم شہباز شریف نے ان کے کردار کو سراہا اور اعتراف کیا کہ کم از کم ایک کروڑ جانیں بچائی گئیں۔

ٹرمپ نے یہ بھی دعویٰ کیا کہ انہوں نے آذربائیجان اور آرمینیا کے درمیان تین دہائیوں سے جاری تنازع کو ڈیڑھ دن میں ختم کرایا، متعلقہ ممالک کو واضح پیغام دیا کہ اگر لڑائی جاری رہی تو امریکا تجارتی اقدامات کرے گا۔

ادھر امریکی صدر نے ایران کو ایک بار پھر دھمکی دی اور کہا کہ اگر مذاکرات ناکام ہوئے تو سخت اقدام اٹھایا جائے گا۔ امریکا اور ایران کے درمیان مذاکرات کا دوسرا دور آئندہ ہفتے متوقع ہے۔ صدر ٹرمپ نے کہا کہ تہران اس بار سنجیدگی سے بات چیت کر رہا ہے اور ایران کو امریکی فوجی طاقت کا اندازہ ہو چکا ہے، مذاکرات ناکام ہوئے تو فوجی کارروائی کے لیے مزید بحری بیڑے تعینات کیے جا سکتے ہیں۔