ٹرمپ انتظامیہ کا فیصلہ کن وار: قانونی تارکین وطن کو چھوٹے کاروباری قرضوں سے روک دیا گیا

صدر ڈونلڈ ٹرمپ کی انتظامیہ نے غیر امریکی شہریوں کے لیے چھوٹے کاروباری مواقع محدود کرتے ہوئے اسمال بزنس ایڈمنسٹریشن (SBA) کے بنیادی ۷(اے) لون پروگرام سے تمام غیر امریکی شہریوں اور قانونی مستقل رہائشیوں کو خارج کر دیا ہے۔

SBA نے نئی ہدایات جاری کرتے ہوئے وہ استثنا بھی ختم کر دیا ہے جس کے تحت غیر شہری یا گرین کارڈ ہولڈرز چھوٹے کاروباروں میں جزوی ملکیت رکھ سکتے تھے۔ اب قانونی مستقل رہائشی اس پروگرام کے تحت کسی بھی کاروبار میں کسی بھی شرح سے ملکیت نہیں رکھ سکیں گے، جس کے لیے وہ اب تک SBA قرضوں کے اہل تھے۔

SBA کی ترجمان کے مطابق ایجنسی اب غیر ملکی شہریوں کی ملکیت والے کاروباروں کے لیے قرضوں کی ضمانت نہیں دے گی، تاکہ ٹیکس دہندگان کا پیسہ امریکی ملازمتوں اور صنعت کاروں کی فلاح میں استعمال ہو۔

تاہم اس فیصلے پر ڈیموکریٹ رہنماؤں نے سخت تنقید کی ہے۔ ان کا کہنا ہے کہ اس پالیسی سے چھوٹے کاروباروں کے لیے قرضوں کا حصول اور بھی زیادہ مشکل ہو جائے گا اور محنتی قانونی تارکینِ وطن متاثر ہوں گے، جو ہمیشہ سے امریکی کاروباری نظام کا اہم حصہ رہے ہیں۔