کوٹ ادو میں تونسہ بیراج پر 120 کنال پر محیط ڈولفن ریزورٹ کھول دیا گیا

جنوبی پنجاب کے ضلع کوٹ ادو میں تونسہ بیراج کے مقام پر دریائے سندھ کے دلکش کنارے ٹورازم ڈویلپمنٹ کارپوریشن آف پنجاب (TDCP) ڈولفن ریزورٹ کا باقاعدہ افتتاح کر کے اسے سیاحوں کے لیے کھول دیا گیا ہے۔ اس ریزورٹ میں سیاحوں کے لیے عالمی معیار کی رہائشی، تفریحی اور معیاری کھانے پینے کی سہولیات فراہم کی گئی ہیں۔

120 کنال کے وسیع رقبے پر قائم اس منفرد ریزورٹ میں آنے والے سیاح نہ صرف دریائے سندھ کے خوبصورت قدرتی مناظر سے لطف اندوز ہو سکیں گے بلکہ کائنات کی نایاب ترین اندھی ڈولفن (Indus Blind Dolphin) کا قدرتی مسکن میں نظارہ بھی کر سکیں گے۔ اس ماحول دوست منصوبے میں سیاحت کے فروغ کے ساتھ ساتھ جنگلی حیات کی بقا اور تحفظ پر بھی خصوصی توجہ دی گئی ہے، جبکہ دریا کی بپھرتی لہروں کا نظارہ کرنے کے لیے ایک خاص ٹیرس (Special Terrace) بھی تعمیر کیا گیا ہے۔

وزیراعلیٰ پنجاب مریم نواز شریف نے سماجی رابطے کی ویب سائٹ ایکس (X) پر اپنے ایک بیان میں اس جدید ڈولفن ریزورٹ کی تکمیل پر مسرت کا اظہار کیا۔ انہوں نے کہا کہ “میگنیفیسنٹ پنجاب” (Magnificent Punjab) وژن کے تحت تونسہ بیراج کا یہ ریزورٹ جنوبی پنجاب میں سیاحت کو فروغ دے گا اور صبح کی چائے کے ساتھ نایاب ڈولفن کا نظارہ سیاحوں کے لیے ایک ناقابلِ فراموش اور منفرد تجربہ ثابت ہوگا۔