ٹیکس اصلاحات کے مثبت نتائج، مالی سال 2025 میں وفاقی محصولات میں نمایاں اضافہ

اسلام آباد: ٹیکس اصلاحات کی مثبت سمت کے باعث حکومتی اقدامات سے محصولات میں نمایاں اضافہ ریکارڈ کیا گیا ہے۔ مالی سال 2025 کے دوران وفاقی حکومت نے ٹیکس اور لیویز کی مد میں 130 کھرب روپے سے زائد رقم جمع کی۔

مشیر وزیر خزانہ خرم شہزاد کے مطابق وفاق کی جانب سے جمع کی گئی ٹیکس آمدن ملکی مجموعی قومی پیداوار (جی ڈی پی) کے تقریباً 11.3 فیصد کے برابر ہے۔ انہوں نے بتایا کہ صوبائی حکومتیں وفاق کے مقابلے میں مجموعی طور پر صرف 0.85 فیصد پر کھڑی ہیں، حالانکہ صوبوں کے پاس خدمات اور زراعت جیسے مؤثر ٹیکس ذرائع موجود ہیں۔

خرم شہزاد نے زور دیا کہ وفاق اور صوبوں کو مل کر متوازن اصلاحات کے ذریعے ہر سطح پر ٹیکس وصولی کے نظام کو مزید مضبوط بنانا ہوگا تاکہ معیشت کو پائیدار بنیادوں پر استوار کیا جا سکے۔