پاکستان اسٹاک ایکسچینج میں مسلسل تیسرے روز شدید مندی، 100 انڈیکس 1690 پوائنٹس گر گیا

آبنائے ہرمز میں آئل ٹینکر جہازوں پر حملوں کے باعث پیدا ہونے والی عالمی و علاقائی کشیدگی کے زیرِ اثر پاکستان اسٹاک ایکسچینج (PSX) کا اختتام مسلسل تیسرے روز بھی شدید مندی پر ہوا۔ کے ایس ای-100 انڈیکس 1690 پوائنٹس کی گراوٹ کے بعد 1,74,777 پوائنٹس کی سطح پر بند ہوا۔ کاروبار کے دوران 100 انڈیکس کی یومیہ بلند ترین سطح 1,75,842 جبکہ کم ترین سطح 1,74,563 پوائنٹس ریکارڈ کی گئی۔ مارکیٹ میں دن بھر 31 ارب 86 کروڑ روپے مالیت کے 61 کروڑ 2 لاکھ شیئرز کے سودے ہوئے، جبکہ کاروبار میں حصہ لینے والی 569 کمپنیوں میں سے 356 کمپنیوں کے شیئرز کی قیمتوں میں کمی اور 113 میں اضافہ دیکھا گیا۔