سوکیش چندر شیکھر کا ویلنٹائن ڈے پر جیکولین فرنینڈس کو 30 کروڑ روپے مالیت کا ہیلی کاپٹرکا گفٹ

ممبئی: بھارتی شہری سوکیش چندر شیکھر، جو 200 کروڑ روپے کے منی لانڈرنگ کیس میں قید ہیں، نے ویلنٹائن ڈے کے موقع پر اداکارہ جیکولین فرنینڈس کو 30 کروڑ روپے مالیت کا لگژری ہیلی کاپٹر تحفے میں دینے کا دعویٰ کیا ہے۔

بھارتی میڈیا کے مطابق، سوکیش نے جیل سے ایک محبت نامہ بھیجا جس میں اداکارہ کو ’’بیبی بوما‘‘ کہہ کر مخاطب کیا اور اپنے مبینہ تعلق کا دوبارہ اظہار کیا۔ خط میں دعویٰ کیا گیا کہ ایئربس ایچ سیریز کا یہ ہیلی کاپٹر اداکارہ کے ابتدائی حروف “JF” کے ساتھ خصوصی طور پر ڈیزائن کیا گیا ہے۔

سوکیش چندر شیکھر نے کہا کہ یہ تحفہ ان کی ذاتی کمائی سے خریدا گیا ہے تاکہ جیکولین شوٹنگ کے دوران دور دراز مقامات تک آسان سفر کرسکیں۔ انہوں نے مزید لکھا کہ جیل کی سلاخوں کے باوجود ان کی محبت میں کوئی کمی نہیں آئی۔

اداکارہ کی جانب سے اس تازہ خط یا مبینہ تحفے پر تاحال کوئی ردعمل سامنے نہیں آیا۔ خیال رہے کہ اس سے قبل بھی سوکیش چندر شیکھر نے جیکولین کو مہنگے تحائف اور جائیداد دینے کا دعویٰ کیا تھا۔