آبنائے ہرمز کی ٹریفک معمول کی طرف واپس آ گئی ہے، میری ٹائم ٹریکر

ایک معروف بین الاقوامی میری ٹائم ٹریکر کمپنی نے تصدیق کی ہے کہ اسٹریٹجک اہمیت کی حامل آبی گزرگاہ ‘آبنائے ہرمز’ میں بحری ٹریفک اب تیزی سے معمول کی طرف واپس آ رہی ہے اور تجارتی مال بردار سمیت تیل بردار بحری جہازوں کی آمدورفت احتیاط کے ساتھ بحال ہو رہی ہے۔

برسلز میں قائم مانیٹرنگ کمپنی کی جانب سے جاری کردہ رپورٹ کے مطابق، 23 جون کو ریکارڈ 31 بحری جہازوں نے کامیابی کے ساتھ آبنائے ہرمز کو عبور کیا ہے۔ ان میں عالمی تجارتی سامان اور توانائی (خام تیل و گیس) سے منسلک دونوں اقسام کے جہاز شامل ہیں جو اب بغیر کسی رکاوٹ کے اپنی اگلی منزلوں کی جانب آگے بڑھ رہے ہیں۔

ٹریکنگ ڈیٹا کے مطابق، اس وقت آبنائے ہرمز سے گزرنے والے زیادہ تر بحری جہاز مغرب سے مشرق کی سمت سفر کر رہے ہیں اور اس نقل و حمل کے لیے ایرانی، عمانی اور بین الاقوامی بحری راستے (لینز) استعمال کیے جا رہے ہیں۔ رپورٹ میں مزید بتایا گیا ہے کہ اس اہم آبی گزرگاہ میں جہاز رانی کا تمام تر عمل حال ہی میں طے پانے والی امریکہ-ایران مفاہمت کی یادداشت (MoU) کے تحت وضع کردہ اصولوں کے مطابق چلایا جا رہا ہے، جس سے عالمی منڈیوں میں پھیلاؤ کا خدشہ کم ہوا ہے۔