ملک بھر میں سولر پینلز کی قیمتوں میں اچانک نمایاں اضافہ

نئے سال کے آغاز کے ساتھ ہی ملک بھر میں سولر پینلز کی قیمتوں میں یکدم بڑا اضافہ دیکھنے میں آیا ہے۔ یکم جنوری سے 585، 645 اور 720 واٹ کے حامل درآمدی سولر پینلز کی قیمتوں میں نمایاں اضافہ ہو گیا ہے۔

مقامی مارکیٹ ذرائع کے مطابق 585 واٹ کے چینی سولر پینل کی قیمت جو پہلے 16 سے 17 ہزار روپے کے درمیان تھی، اب بڑھ کر 20 سے 21 ہزار روپے ہو گئی ہے۔ اسی طرح 645 واٹ کے سولر پینل کی قیمت 20 ہزار روپے سے بڑھ کر 24 سے 25 ہزار روپے تک پہنچ گئی ہے۔

720 واٹ کے حامل سولر پینلز کی قیمت میں سب سے زیادہ اضافہ ہوا ہے، جو پہلے 22 سے 25 ہزار روپے میں دستیاب تھے، اب ان کی قیمت 30 سے 35 ہزار روپے کی سطح پر آ گئی ہے۔

کراچی الیکٹرانکس ڈیلرز ایسوسی ایشن کے نائب صدر سلیم میمن کے مطابق عالمی منڈی میں چاندی اور تانبے کی قیمتوں میں اضافے سے چینی سولر کمپنیوں کی پیداواری لاگت بڑھ گئی ہے، جس کے باعث گزشتہ پانچ ماہ میں فی واٹ قیمت 22 روپے سے بڑھ کر 33 روپے ہو چکی ہے۔