بھارتی گلوکار جوبین نوٹیال کی خفیہ شادی؟ مداحوں میں تجسس

بھارتی موسیقی کی دنیا کے معروف گلوکار جوبین نوٹیال کی جانب سے اتراکھنڈ میں خاموشی سے شادی کرنے کی خبروں نے سوشل میڈیا پر مداحوں کو حیرت میں ڈال دیا ہے۔ رپورٹس کے مطابق، 36 سالہ گلوکار نے اپنے آبائی علاقے میں ایک انتہائی سادہ اور نجی تقریب میں اپنی بچپن کی دوست کے ساتھ زندگی کے نئے سفر کا آغاز کیا ہے۔

اگرچہ جوبین نوٹیال نے خود ان خبروں کی باضابطہ تصدیق نہیں کی ہے، تاہم ذرائع کا دعویٰ ہے کہ تقریب میں صرف خاندان کے قریبی افراد اور چند مخصوص دوستوں کو ہی مدعو کیا گیا تھا۔ سوشل میڈیا پر وائرل ہونے والی تصاویر میں جوبین نوٹیال کو پیچ رنگ کے خوبصورت کرتے اور ایمرلڈ ہار میں دیکھا گیا، جبکہ ان کی مبینہ دلہن بھی ان کے ہم رنگ لباس میں نظر آئیں۔ دلہن کی شناخت اور شادی کی مزید تفصیلات کو فی الحال مکمل طور پر خفیہ رکھا گیا ہے، جس کی وجہ سے مداحوں میں تجسس بڑھتا جا رہا ہے۔

یاد رہے کہ جوبین نوٹیال نے 2011 میں ایک رئیلٹی شو سے اپنے فنی سفر کا آغاز کیا تھا اور آج وہ بالی ووڈ کے صفِ اول کے گلوکاروں میں شمار ہوتے ہیں۔ “تم ہی آنا” اور “راتیں لمبیاں” جیسے بے شمار ہٹ رومانوی گانے دینے والے گلوکار کی اچانک شادی کی خبر ان کے کروڑوں چاہنے والوں کے لیے کسی سرپرائز سے کم نہیں۔