اوورسیز پاکستانیوں اور لیبر ویلفیئر پر وفاق و سندھ میں مشاورت

کراچی: وزیراعلیٰ سندھ سید مراد علی شاہ سے وزیراعلیٰ ہاؤس میں وفاقی وزیر برائے اوورسیز پاکستانی و انسانی وسائل کی ترقی چوہدری سالک حسین نے ملاقات کی۔ ملاقات میں اوورسیز پاکستانیوں، انسانی وسائل کی ترقی اور لیبر ویلفیئر سے متعلق امور پر تفصیلی تبادلۂ خیال کیا گیا۔

اجلاس میں وفاقی سیکریٹری اوورسیز ندیم اسلم چوہدری، آصف جمال، طارق حسن اور عمر مشتاق شریک تھے، جبکہ وزیراعلیٰ سندھ کے ہمراہ صوبائی وزیر محنت سعید غنی اور چیف سیکریٹری سندھ آصف حیدر شاہ موجود تھے۔

ملاقات کے دوران ای او بی آئی اور ورکرز ویلفیئر فنڈز کی صوبوں کو منتقلی (ڈی وولوشن) پر تفصیلی گفتگو ہوئی۔ وزیراعلیٰ سندھ نے کہا کہ ای او بی آئی اور ورکرز ویلفیئر فنڈز کی صوبوں کو منتقلی سے مزدوروں کو بڑا فائدہ ہوگا، تاہم قانونی تنازعات کے باعث یہ فنڈز نہ وفاق کو مل رہے ہیں اور نہ ہی صوبوں کو۔

وفاقی وزیر چوہدری سالک حسین نے یقین دہانی کرائی کہ اس مسئلے کا حل باہمی مشاورت سے نکالا جائے گا۔ اجلاس میں وفاق اور سندھ حکومت کے درمیان مشاورت جاری رکھنے، ورکرز کے مسائل مذاکرات کے ذریعے حل کرنے اور لیبر ویلفیئر سے متعلق معاملات کو جلد منطقی انجام تک پہنچانے پر اتفاق کیا گیا۔