’’یوم استحصال کشمیر‘‘جنوبی ایشیا کی تاریخ کا ایک سیاہ دن ہے: شرجیل میمن

سینئر وزیر سندھ شرجیل انعام میمن نے ’یومِ استحصالِ کشمیر‘ کے موقع پر کشمیری عوام کے ساتھ کامل اور غیر متزلزل یکجہتی کا اظہار کرتے ہوئے ۵ اگست کو جنوبی ایشیا کی تاریخ کا ایک سیاہ ترین دن قرار دیا ہے۔ اپنے ایک بیان میں صوبائی وزیر نے کہا کہ بھارت نے مقبوضہ جموں و کشمیر کی خصوصی آئینی حیثیت ختم کر کے عالمی قوانین اور اقوامِ متحدہ کی قراردادوں کی کھلی خلاف ورزی کی ہے۔ انہوں نے کہا کہ کشمیری عوام دہائیوں سے اپنے حقِ خودارادیت کے لیے عظیم قربانیاں دے رہے ہیں اور بھارتی ریاستی جبر، ظلم و ستم اور انسانی حقوق کی پامالیاں ان کے جذبہ آزادی کو ہرگز کمزور نہیں کر سکتیں۔ شرجیل میمن نے واضح کیا کہ پاکستان پیپلز پارٹی اول دن سے کشمیریوں کے حقِ خودارادیت کی مضبوط حامی رہی ہے اور چیئرمین بلاول بھٹو زرداری کی قیادت میں پارٹی ہر عالمی فورم پر کشمیریوں کی آواز بلند کرتی رہے گی۔