آئی سی سی بھارتی بورڈ کی خواہش پر فیصلے کرتاہے، بھارتی صحافی کی کڑی تنقید

بھارتی صحافی شاردا اگرا نے کہاہے کہ کہاکہ انٹرنیشنل کرکٹ کونسل کے ایگزیکٹو بورڈ میں بھارتی حمایت نظرآتی ہے۔ورلڈ کپ کا موجودہ معاملہ نہایت ہی بھونڈے انداز میں ہینڈل کیا گیا ہے۔ انہوں نے بھارتی کرکٹ بورڈ اور آئی سی سی پر تنقید کرتے ہوئے کہا ہے کہ آئی سی سی وہی کرتا ہے جو بی سی سی آئی چاہتا ہے۔

شاردااگراکاکہناتھاکہ پاکستان کے ورلڈ کپ سے دستبردار ہونے پر آئی سی سی کو شدید نقصان ہوگا، پاکستان کی اہمیت اس لیے ہے کہ پاک بھارت میچ سے بہت زیادہ پیسہ بنتا ہے۔موجودہ حالات میں آئی سی سی کی اپنی ساکھ کافی متاثر ہوچکی ہے، یہ معاملہ اس وقت ہوا جب ایک بنگلادیشی پلیئر کو آئی پی ایل سے نکالا گیا تھا۔

ان کا کہنا تھا کہ پاکستان کا اس معاملے میں پڑنا ماضی میں بھارتی رویے کا جواب ہوسکتا ہے، بی سی سی آئی بھارت کے حکمرانوں سے جڑی ہوئی ہے۔مستفیض الرحمٰن کو آئی پی ایل سے نکالنا سیاسی فیصلہ تھا۔

شاردا اگرا نے کہا کہ ورلڈکپ کے موجودہ بحران کی وجہ بھارت کا آئی سی سی اور دیگر بورڈز پر اثر انداز ہونا ہے، آج جو حالات ہیں اس کی وجہ انٹرنیشنل کرکٹ میں بھارت کی مالی قوت ہے۔

بھارتی صحافی نے کہا کہ جب بنگلادیش کو بھارت جانے سے مسئلہ ہوا تو آئی سی سی کو ٹورنامنٹ کے قوانین یاد آگئے، بھارتی ٹیم کو کس نے پاکستانی پلیئرز سے ہاتھ ملانے سے روکا یہ آج تک کوئی نہیں جانتا۔

شاردا اگرا نے کہا کہ کرکٹ ایک مشترکہ ثقافت کا موقع ہونے کے بجائے سیاسی لڑائی کا مرکز بن چکا ہے ۔ آئی سی سی اب ایک سنجیدہ اسپورٹس باڈی نہیں رہی۔