یوکرین تنازع: روس کا امریکا سے مذاکرات جاری رکھنے کا اعلان

روسی وزیرِ خارجہ سرگئی لاوروف نے واضح کیا ہے کہ روس یوکرین تنازع کے حل کے لیے امریکہ کے ساتھ مذاکراتی عمل کو آگے بڑھانے کے لیے تیار ہے۔ چین کے حالیہ دورے کے بعد میڈیا سے گفتگو کرتے ہوئے انہوں نے کہا کہ ماسکو آج بھی انکریج (الاسکا) میں ہونے والے سربراہی اجلاس کے معاہدوں پر قائم ہے، جن کی توثیق صدر ولادیمیر پیوٹن متعدد بار کر چکے ہیں۔ لاوروف کے مطابق، روس نے الاسکا ملاقات کے دوران امریکی تجاویز کو نیک نیتی سے قبول کیا تھا، جس میں یوکرین کے زمینی حقائق کو قانونی طور پر تسلیم کرنا شامل تھا، تاہم یوکرینی صدر زیلنسکی کا کریمیا اور ڈونباس کو “مقبوضہ” قرار دینا مذاکراتی روح کے منافی ہے۔

روسی وزیرِ خارجہ نے نشاندہی کی کہ اگرچہ اس مذاکراتی عمل کی بنیاد ڈونلڈ ٹرمپ اور ولادیمیر پیوٹن نے رکھی تھی، لیکن موجودہ امریکی انتظامیہ تاحال سابق صدر جو بائیڈن کے دور کی پابندیوں کو نہ صرف برقرار رکھے ہوئے ہے بلکہ ان میں اضافہ بھی کیا جا رہا ہے۔ انہوں نے یورپی قیادت بشمول برسلز، پیرس، برلن اور لندن پر الزام عائد کیا کہ وہ ان امن معاہدوں کی راہ میں رکاوٹیں کھڑی کر رہے ہیں، جس سے خطے میں استحکام کی کوششیں متاثر ہو رہی ہیں۔

سرگئی لاوروف نے فرانسیسی صدر ایمانوئل میکرون اور برطانوی وزیراعظم کیئر اسٹارمر کی جانب سے یوکرین میں “استحکامی دستے” بھیجنے کی تجاویز پر کڑی تنقید کرتے ہوئے کہا کہ ایسے اقدامات امریکی تکنیکی تعاون کے بغیر ناممکن ہیں۔ انہوں نے اعادہ کیا کہ روس ہنگری جیسے دیگر ممالک کے ساتھ بھی مکالمے کے لیے تیار ہے، بشرطیکہ مذاکرات قومی مفادات کی بنیاد پر ہوں۔ ان کے بقول، ولادیمیر پیوٹن ہمیشہ سے بات چیت کے حامی رہے ہیں، لیکن اس کے لیے فریقین کا سنجیدہ ہونا ضروری ہے۔