پرویز الہیٰ نے جسمانی ریمانڈ سے متعلق اپیل واپس لے لی، درخواست خارج

سپریم کورٹ آف پاکستان نے پنجاب اسمبلی میں غیر قانونی بھرتیوں سے متعلق کیس میں سابق وزیراعلیٰ پنجاب چوہدری پرویز الٰہی کی جانب سے جسمانی ریمانڈ کے خلاف دائر اپیل واپس لینے کی بنیاد پر خارج کر دی ہے۔ جسٹس ہاشم کاکڑ کی سربراہی میں قائم 02 رکنی بینچ نے سماعت کے دوران ریمارکس دیے کہ یہ معاملہ اب غیر مؤثر ہو چکا ہے اور اس پر محض علمی (اکیڈمک) بحث کرنے کا کوئی فائدہ نہیں۔ پرویز الٰہی کے وکیل عامر سعید راں کے یہ بتانے پر کہ مقدمے میں پرویز الٰہی کی ضمانت کے خلاف حکومت کی درخواست بھی خارج ہو چکی ہے، عدالت نے اپیل واپس لے کر متعلقہ فورم سے رجوع کرنے کی ہدایت کی۔ جس پر قانونی ٹیم نے درخواست واپس لے لی اور بینچ نے کیس کو باضابطہ طور پر نمٹا دیا۔