سعودی وزیرِدفاع کی صدر ٹرمپ سے ہنگامی ملاقات، ولی عہد کا پیغام پہنچایا: امریکی میڈیا

سعودی وزیر دفاع شہزادہ خالد بن سلمان نے واشنگٹن میں امریکی نائب صدر جے ڈی وینس سے ملاقات کے بعد امریکی صدر ڈونلڈ ٹرمپ سے اہم اور ہنگامی ملاقات کی ہے۔ امریکی میڈیا کے مطابق اس ملاقات کا بنیادی مقصد سعودی ولی عہد شہزادہ محمد بن سلمان کا خصوصی اور اہم پیغام امریکی صدر تک پہنچانا تھا۔ ملاقاتوں کے دوران سعودی وزیر دفاع نے واضح کیا کہ سعودی عرب خطے میں ایران کے ساتھ کشیدگی میں کمی کا خواہاں ہے، تاہم ایران نواز عراقی ملیشیاؤں کی جانب سے توانائی تنصیبات اور بنیادی ڈھانچے پر حملوں سے ‘ریڈ لائن’ عبور کی گئی جس کا جواب دینا ضروری تھا۔ شہزادہ خالد بن سلمان نے امریکی قیادت پر زور دیا کہ اسرائیلی وزیراعظم نیتن یاہو ایران سے کشیدگی بڑھانا چاہتے ہیں جبکہ کشیدگی میں کمی ہی پائیدار حل ہے۔ حوثیوں کے معاملے پر ان کا کہنا تھا کہ فی الوقت امریکہ کی براہِ راست مداخلت کی ضرورت نہیں کیونکہ سعودی عرب خود ان سے نمٹنے کی صلاحیت رکھتا ہے اور مذاکرات کا سلسلہ بھی جاری ہے۔